• Біздің парақшалар:
  • pецензиялар (барлығы: 420)

  • Ернар Бекенов

    Барлық рецензиялар: 119

    Мен комикстардың да, олардың экранизацияларының да фанаты емеспін. Сол себепті, "Бэтмен Суперменге қарсы" несімен жақпады, қай жерімен комикс сүйер қауымның көңіліне қаяу түсірді - оны мен дәл басып айта алмаймын. 

    Сондықтан мен бұл фильмді қатардағы ауқымды жоба, көпшілік күткен премьера ретінде ғана қарастырдым. Дегенмен, Бэтмен мен Супермен осыған дейін киноэкранда әлі кездеспеген екен. Аталған картинаның басты құндылықтарының бірі де осында болса керек (комикс фанатына айналып бара жатқан сияқтымын ба?).

    Мен үшін классикалық Бэтмен - Кристофер Ноланның "Қара рыцары", Кристиан Бэйлдің орындауында (комикс фанаттары мені кешірсін). Өйткені, ертеректегі Бэтмендерді мен көрген емеспін, көрсем де есімде жоқ. Сол себепті, жаңаланған Бэтменді (Бен Аффлек) классикалық Бэтменмен (Кристиан Бэйл) салыстырудың өзі бір ғанибет екен.

    Салыстырғаннан кейін өз ойыңды айтпай кетуге тағы болмайды. Менің ойымша, Бен Аффлек жаман емес. Бірақ жақсы да емес. Ол басқа. Әр актер өзі сомдаған Бэтменге өзіндік ерекшелік әкелетін шығар. Бұл да солай. Бастапқыда осы рөлге Аффлек таңдалған кезде, комикс фанаттары мақұлдай қоймағаны рас. Бұны актер жақсы біледі, сол себепті қатты тырысады, көрермендерін түңілдірмеуге бар күшін салады. Өз басым, Бен Аффлек көрермендердің ең минимум талаптарын орындай алды деп есептеймін.

    Ноланның дәуірінде өзін іштей жеп жүретін, тіпті аздап қайғылы Қара батырды көрсек, бұл жолы алдына нақты мақсат қойған (біздің жағдайымызда Суперменнің "шаңын қағу"), қартая бастаса да әлі сақа Готэм сақшысын көрдік.

    Фильмнің өзін санқырлы болғаны үшін ерекше деуге болады. Қараңыз - "Бэтмен Суперменге қарсы" осыған дейін жарық көрген 2013 жылғы "Болат адамның" тікелей жалғасы, дей тұрғанмен жаңартылған Бэтмен туралы фильмдер сериясының да бастауы. Оның үстіне бұл Супермен мен Бэтменді бетпе-бет кездестірген тұңғыш киножоба (қателессем, фанаттар кешірсін). Кинокомикс фанаттарына бұл деректердің өзі үлкен оқиға болуы керек деп есептеймін.

    Бірақ мен қарапайым көрермен тұрғысынан қараймын деп айтып кеттім ғой. Сондықтан қатардағы блокбастерге кірген адам ретінде сөйлеп көрейін.

    Осы тұрғыда сыншылардың кейбір пікірімен келісетін тұстарым бар. Соның бірі - эффектілердің тым көптігі. Жойқын жарылыс, қираған сансыз көп ғимараттар, осындай көріністерден кейін Метрополисте (әлде Готэмде) тірі адам қалды ма өзі деген сұрақ қоя бастайсың. Бастапқыда халық игілігі үшін күрескен қаһармандардың текетіресі жеке мүдденің қамына айнала бастағанда, ал бұл өз кезегінде жазықсыз жандардың құрбанына алып келгенде авторлардың бұнымен не айтқылары келгенін өзіңше болжауға мәжбүр боласың. Жобаның ауқымын қомпайту үшін визуал эффект мамандарының жұмысы тым асыра сілтеп жібергендей әсер береді екен.

    Бірақ, екі суперқаһарманды тірестіру оқиғасы арқылы берілетін негізгі мораль да айқын көрсетілген. Бірінші кезекте - әрине, адамдардың қанағатсыздығы. Құтқару операциясының ауқымы кеңейген сайын, бұрынғы жақсылықтардың маңызы азая түседі. Ал төтенше жағдай неғұрлым ауқымды болса, құрбандар да соғұрлым көп болатыны белгілі. Адамдар аман қалғандарға шүкіршілік етудің орнына, Суперменге қояр талаптарын күшейте түседі, одан идеалдықты күтеді. Ал осындай қоғамдық конфликтілерді аңдып отырған басылымдар жағдайды өршіте түседі. Бэтмен де сондай әдейі ушықтырылған жағдайдың құрбаны деп ойлаймын. Екеуінің текетіресі де осыған негізделген.

    Фильмдегі кейбір құбылыстардың маңызын арттыру үшін бірқатар детальдарға ерекше мән беру бар да, осыған имитация жасау бар. Зак Снайдер лирикалық шегіністер мен флешбектер жасаймын деп қателескен тәрізді. Олар керек те шығар, бірақ онсыз да фильмді әдемі жасауға болар еді. Сыншылар кінәлаған созылыңқы сюжетке осы қажетсіз шегіністер себеп болды деп ойлаймын. 

    Жалпы актерлер өз рөлдерін алып шықты деп ойлаймын. Джесси Айзенбергке, Эми Адамсқа ешқашан күмән келтірген емеспін. Біз үшін бірінші орында Аффлек пен Кавиллдің өз рөлдерін алып шығуы қызық еді. Генриді білмеймін, бірақ Бенге ешқандай наразылық жоқ.

    Меніңше, суперқаһарманизмнің барлық канондарын ескере отырып жасалған картина. Фильм түңіліп кететіндей нашар да емес, өзгелерге ауыздың су құрығанша мақтап беретін супер де емес. Жасаушылар кем дегенде өз мақсаттарын толықтай орындады деп ойлаймын. Дымын қалдырмай сынамау үшін қоятын талаптар деңгейін сәл түсіру керек шығар, білмеймін.

  • Раймбек Егембердиев

    Барлық рецензиялар: 3

    • 16 қыз
    • 2016
    • Рейтинг: 6,429
    • Дауыс саны: 7

    "16 қыз" отбасымен бірге отырып көретін және әзілдері де соған жарасқан фильм дер едім. Режисердің көздеген мақсаты да сол сияқты. Үлкен жастағы аға әпкелеріміз бен жасөспірім жастарды түгел қамтып қызықтыра алады. Фильмін алғашқы аптада 40 миллион табуына да сол септігін тигізген шығар.

    Кірерден алдын киноның бар әзілі ауыл өміріне тіреліп қалған шығар деп кірдім. Бірақ әзілдер орынды және заманауи әдемі кино екеніне көзім жетіп шықты. Актерлерде де жасандылық жоқ, рөлдерін шын көңілден ойнаған, образға кіре білген. Бұрындары қазақ киносын көргенде жасандылық пен робот секілді сөйлеуден көзіміз бен құлағымыз қан жуса болатындықтан, фильмнің бұл тұстардан серпіліс жасағаны ерекше әсер берді. Тек Аша Матайдың күлкісі жасанды болып көрінді. Берік Айтжановқа сөз жоқ образды әдемі алып шыққан.

    Қысқаша айтқанда, біраз жылдар бойы телеканалдарда қайталап беріліп жүретін тамаша отбасылық фильм.

  • Айкона

    Барлық рецензиялар: 138

    Осы жылы кино саласында рас қуанышты жаңалықтар болып жатыр. Қазақ киносына кинотеатрларда билет болмай қалып, кино сеанстарды көбейтіп жатыр. Әрине, сұраныс бар да табыс бар, табыс бар жерде талас бар. Талас бар жерде сапаның өсетінін өздеріңіз де білесіздер ғой.

    Сәбина келіннің басынан кешкендері фильмінің жалғасын көріп тастадық. Өте қызықты, күлкілі. Жалпы, индия, өзбек киноларын қарасаң кино тақырыбы тек отбасына байланысты және келін тақырыбына құралған. Біздің де менталитке осы тақырып жақын сияқты. Халықтың ризалығына қарап осындай ойға келдім. (Мән бермеңіздер, бүгін типа философ болып, жалпы әңгіме ол туралы емес). Келинка

    Сабинка 2-ның басты маған ұнаған нәрсесі әйел бақытының не екенін түсіндіріп бергені болды. Кино, сізді ойламаған нәрселердің болатындығымен баурап алады және оны күлкілі етіп көрсетуімен ерекшеленеді.

    Нұртас Адамбайдың киноларында бір нәрсені байқадым. Ол киноның соңында күтпеген конец болуы. Нұртас Адамбайдың осы фишкасын осымен екінші рет байқадым. Біріншісін "Побег из ауладан" байқаған ем. Міне, екіншісі осы фильмде. Шыны керек, таңқалдыра алды. Осылай бір кездері Нұртасты ұнатпағандар оны аздап осылай мойындап келеді. Әрине, кейбір жерлері маған тым артық болған сияқты.

    Дегенмен, маған бұл фильмде Жандос Айбасов ұнады. Тым сымбатты жігіт екеніне көзім жетті. Қарлығаш Мұхамеджанованың әдемілігі расымен қазақи әдемі, актерлық шеберлігі өзіне сай. Есжан Хамидуллин тамаша актер, мықты. Адамның түрі емес актерлық шеберлігі маңызды екенін көрсете білді халыққа. Бірақ, түріне бола қатты танымал болып кетпегеніне өкінем. Жалпы мықты актер.

    Бүгіннен бастап кинотеатрлардан көрсетілетін киноға барыңыздар, күліңіздер, үйреніңіздер дегім келеді.

    Берер бағам 7/10.

  • Ернар Бекенов

    Барлық рецензиялар: 119

    • 16 қыз
    • 2016
    • Рейтинг: 6,429
    • Дауыс саны: 7

    Қанағат Мұстафиннің кинодағы екінші толықметражын көре отырып, еріксіз түрде Ермек Тұрсыновтың "Кемпірімен" салыстыра бастайсың. Оған себеп те жетеді: ауылдың жайдар мінезді тұрғындары, Алматыға үлкен мақсатпен сапарлау, оңтүстік астананың әсем жерлерін аралау, ретромашина ("16 қызда" - "Волга", "Кемпірде" - "Москвич"). Жалпы фильмнің атмосферасы тұрғысынан алсақ та, екеуінің ортақ тұстары көп. Бірақ Қанағаттың еңбегін бәрібір жоғары қоямын. Неге? Түсіндірейін.

    Естеріңде болса, Ермек Тұрсынов "Кемпір" жобасы туралы айта бастағанда, Совет заманында қалыптасқан қазақ киноклассикасына құрмет ретінде сапалы комедия түсіргісі келетінін айтқан еді. "Кемпірді" қоюдағы мақсат - отбасы болып көруге тұрарлық, бүгін ғана емес, келешектің ұрпақтары үшін де көрілімді бола алатын мейірімді фильм жасау еді. Тіпті, халықтың сүйіктісі "Тақиялы періштеге" сілтейтін бір көрініс те әдейі кинокартинада қолданылды. Бірақ, қандай себептер әсер еткенін білмеймін, Тұрсынов қойған мақсатқа сәл жете алмай қалды. "Кемпірді" еске алатындарды да айналамнан көріп жүргенім жоқ қазір.

    Мұстафин де кинотарихымыздың алтын кезеңі деп атауға болатын 60-70 жылдарға құрметпен қарайтынын көрсетті. Бұл сюжет өрбісі мен кейіпкерлердің сөйлеу стилінен кәдімгідей байқалып тұрады. Оның үстіне саундтрек ретінде қолданылған "Досмұқасан" ансамблінің ретроәндерін қосыңыз. Оқиға қазіргі заманда өрбиді демесеңіз, атмосферасы әке-аталарымыз өмір сүрген тыныш, уайым-қайғысыз әлемге топ еткізеді.

    Сюжет құрылымының жинақылығы, барлығы ой елегінен өткізіліп құрылғаны көрініп тұр. Әрине, созылыңқы тұстары кездеседі, бірақ бұл жалпы құрылымға аса әсер етпейді. Сюжет барысында өрбитін әрбір оқиғаның басы мен логикалық шегі айқындалған. Қысқасы, сценарийдің атүсті жазылмағаны, бәрі кинематографтың заңдылықтарын ескере отырып жасалғаны көрінеді.

    Актердің талантын ашуға өзі сомдайтын рөлі емес, режиссер қоятын талап көп әсер ететінін уақыт өткен сайын анық түсініп келемін. Иә, Берік Айтжанов қазір телеэкранда да, кинода да көп. Сондықтан ба, кейде ол қатысқан жобаларды тез ұмытып қалатын жағдайға жеттік. Бірақ "16 қызда" бұрынғыдан өзгешелеу Берікті көрген сияқтымын. Жалпы актерлік құрамның сәтті таңдалғанын байқаймыз.

    "Тақиялы періштені" классика дейміз ғой. "16 қыздың" да соның қатарына кіруіне толықтай құқығы бар деп есептеймін.

  • Айкона

    Барлық рецензиялар: 138

    Египет десе елең ете қалатынымыз рас. Тарихтан бөлек, сол елдің атауының өзінде бір құпиялық пен сиқыр жатқандай...

    Бүгіннен бастап кинотеатрлардан көрсетілетін "Боги Египта" киносы трейлерінен бастап адамды осы бір сиқырлы әлемге шақырғандай әсер қалдырды.

    Рас, Мысыр туралы бірнеше жүз кино бар. Бірақ, осы киноның түсірілу сапасы, кинодағы эффектілер миф деп келген әлемнің болғанына және тура сіздің сол кинода сол жерде тұрғандай әсер беруі басқаларынан ерекше екенін көрсетеді. Костюмдерінің әдемілігі, қаланың әдемілігі адамды қызықтырады. Әр деталь ойластырылған. Бүгінгі күні Пирамидаларға қараған кезде оларды жасаған кезде расымен осындай мықты қоғам болғанына сендіреді. 

    Фильмнің сюжеті Гор мен Сеттің билік үшін таласы туралы ежелгі египеттік миф әңгімелерінің желісімен түсірілген. Билікке таласқан Сет өз ағасы Осиристі өлтіріп оның ұлы Гордың екі көзін ойып алады, ал египет халқын құлға айналдырады. Осы кезде Горға қарапайым адамдар көмекке келеді.

    Киноның желісі өте қызықты, екі сағаттан ұзақ киноның қалай тез өтіп кеткенін байқамай қаласыз. Джерард Батлердың тарихи киноларға түсуден алдына жан салмайтын актер екеніне тағы бір көзіңіз жетеді, ал Николай Костер-Валдаудымүлдем басқа қырынан танисыз. "Игра престоловта" оны жек көрсеңіз, мына кинода оған деген бір оң көз қарасыңызды пайда болғанын аңғарасыз. Маған қатты ұнаған актерлер әрине жас Брентон Туэйтес пен Кортни Итон болды. Олар сондай әдемі, жас әрі талантты. Брентон Туэйтестың ойынына бір еркелік пен сотқарлық көрініп тұр. Оны бірден көрген кезде жақсы көріп қаласыз.

    Киноны «Тор», «Троя» сияқты фильмдермен бір қатарға қоюға болады. Бір емес бірнеше рет көре бергің келеді. Киноға берер бағам 9/10

  • Айкона

    Барлық рецензиялар: 138

    Ох, мен қалай романтиканы жақсы көрем десеңізші, тіпті шектен тыс жақсы көрем десем де болады. Романтикалық кинолар қыздар қатты әсер ететіні бар, дегенмен шектен шықпауға тырысу керек.

    Бүгіннен бастап Қазақстандық кинотеатрларда Ресейлік "30 кездесу" фильмі көрсетіле бастады. Иа, мойындаймын банальды тақырып махаббат туралы. Дегенмен, Наталия Медведева өте талантты актриса. Оның "Комеди вумен" рөльдерінен ерекше екенін білетінмін. Бір жағынан Наталияны романтикалық рөльден көру біртүрлі болды, себебі оның не ұсына алатын білгендіктен күтпеген ем.

    Жігіті тастап кеткен қыз интернеттен онлайн, әрі тегін кеңестер іздей бастайды. Солай ол "30 кездесу" атты треннингке тап болып соны орындай бастайды. Киноның фишкасы - ол кинодан сіз өзіңізді көруіңіз мүмкін. Мысалы, мен интернет арқылы қаншама жігітпен таныстым, мойындау керек барлық кездесуім керемет болды дей алмаймын))) Сол сияқты кинода да "ерекше адамдармен ерекше кездесу" тізбегі өтеді.

    Кино да өмірдегідей көктен іздегенін қасыңдағы адам болып шығады. Бастысы адамның өзіне деген сенімділігі. Егер сіз өзіңізге сенсеңіз сізге адамдар өздері тартыла бастайды.

    Кино өте қызықты, күлкілі. Ауыр жұмыс күнінен кейін романтикалық көңіл-күйге бөленіп сүйіктіңмен немесе құрбыңмен күліп отырып көретін жақсы кино. Берер бағам 3/5.

  • Айкона

    Барлық рецензиялар: 138

    Осы киноға ешқандай рецензия, пікір оқымай барғаным қандай жақсы болған деген ой келді. Себебі, адамдардың пікірі әйтеуір сана сезіміңнің бір бұрышына әсер етіп, киноны көрмей жатып сенің ойыңды өзгертуі мүмкін.

    Кино барлық қауымға арналмаған және бізде сексуалдық аутқуларға халықтың көз-қарасы басқаша екенін түсінуіміз керек. Дегенмен, киноны еш артық ойсыз, идеологиясыз жәй бір адамның тағдыры ретінде көріп шығуға кеңес беремін.

    Мені таңқалдырған Эдди Рейдманның актерлық шеберлігі болды. Ол осы рольге өте дұрыс таңдалған актер екеніне сендіре алды және Лилидың бар болмысын, оның ойын, оның мақсатын, қылығын, эгоистігін жеткізе алды. Оның қолдарының нәзіктігі, майысқандары қыздардың өзін жолда қалдырады. Маған мынандай ой келді "осы кинодан кейін Эддидың өзінде бір өзгешелік болмады ма екен?" деген.

    Екінші таңқалдырған адам ол Эйнардың әйелі Герда болды. Қазіргі заманғы жастар әйелдер жайлы басқаша ойлайды, бірақ әйел адамдар ешқашан өзгермеген. Мүмкін, олар тұрмысқа шыққанша барынша өзінің болмысына кері қылық көрсетер, тұрмысқа шыққаннан кейін олардың бар болмысы өзіміз үйде күнде көріп жүрген анамыздан аумай шыға келеді. Герда барынша күйеуін сүйді, адал болды. Тіпті күйеуінің ессіз әркетін қолдады, соңына дейін бірге болды. Нағыз әйелдің өзінің бақытынан басқаның бақытын жоғары қоятынын көрсете алды. Жаным ашыды, "сорлы әйел" дегім келді, бірақ ол оны түсінбес еді...

    Лили, о Лили... немесе Эйнар. Сені екі рөліңде де соншалықты эогист, өзімшіл екеніңді көруге болады. Түсінем, адамның ішкі жан дүниесінде басқа нәрсе болса басқасы қызықтырмауы мүмкінін бірақ, сен ең құрмағанда бір рет Гердаға "бар, бақытыңды тап" деп айтпадың ғой. Бір жағынан адамды "сүйемін" деп тұрып өзіңнің ішкі ойыңнан таңбауыңның, өз ойыңнан қайтпаудың қандай екенін көзімді жеткіздің.

    Кино өте мұңлы, себебі ол - адамның тағдыры. Кино әдемі түсірген, себебі ол жерде адамның көңіліне әсер ететін сәттер өте көп. Том Хупер адамдардың сезімінде ойнаудың шебері. Себебі сен күнделікті байқамайтын немесе қалыптастырып алған ойларыңның шеңберінен шығуға, бар әлем қарсы болған нәрсеге басқаша қарауға итермелейді.

    Киноның соңында ойлайсың, сонша күш салған жеңістің жемісін көре алмай өмірден өтіп кетуің мүмкін ғой... Былай қарасаң бәрі алдамшы...

  • Айкона

    Барлық рецензиялар: 138

    Қаңтар бойы күткен фильмдерімнің бірі еді, себебі жарнама айқайлап шақырды. Бардым, расы керек жарнама как то әсер етеді маған. Сомен, фильм мен күткендей болмады, балаларды алдап түсіргендей әсер қалдырды. Түсіру жұмысы жақсы, сценарий піспей қалған нан сияқты. Кино өте қысқа, мүмкін жалғасы шығып қалар деген ой маза бермеді.#ХлояМорец үшін барып ем, сол ғана болды қызығы. Былай киноның идеясы жақсы, бірақ романтиканы қосып аздап каша жасап жіберген.

  • Ернар Бекенов

    Барлық рецензиялар: 119

    Фильм тым жақсы басталып еді. Алғашқы жартысы өзге әлемнен келген бөтендердің Жерді кезең-кезеңмен жаулап алу процесін баяндайды. Бастапқы қарқынына қарай отырып, соңына дейін шиеленістен үзбейді, экшнға толы әдемі кадрлар болады деп күтесің, жойылу алдында тұрған адамзаттың шешуші шайқасын елестете бастайсың. Бірақ қимылдаудың орнына бір-бірімен қарым-қатынастарын талқыға салған жасөспірімдерді көріп, диалогтардың жалпы атмосферамен қалай қинасаң да үйлеспейтін өрбісіне қарап мырс-мырс күлумен болдық.

    Фильмге негіз болған шығарманы оқыған емеспін. Бірақ бестселлер де соншалықты дарынсыз жазылды дегенге аса сенбеймін, әйтпесе бестселлер атана ма ма?

    Хлоя Грейс Морец болмаса, қалғандарының ойыны көңіл көншітпеді. Лив Шрайбер атымен ғана ерекшеленіп тұр, оған назар аударуға қажетті экрандық уақыт та бөлінбеген. Көрермендердің көңілін жібітеміз деп артық тырысып жібергендей әсер береді, әйтеуір сентиментке ұқсас сәттер көп, бірақ өзі жоқ. Яғни актерлер өз бастарындағы қайғылы оқиғаларға сендіре алмады, ал көрерменді қуантуы тиіс сәттер кері реакцияға ұшырап жатты.

    Тіпті осы сәтсіз іске асырылған моменттер әдейі көңіл көтеру үшін жасалған ба, әлде шынымен нашар жұмыстың нәтижесі ме деп екі ойға қалдырады.

    Сюжеттің өрбуі мен оқиғалардың баяндалуын ескерсек, бұл экранизация кинодан гөрі, сай-фай сериал үшін керемет жарасар еді. Оның үстіне бұл жанрдың телевидениеде қазір дәуірі жүріп тұр.

  • Айкона

    Барлық рецензиялар: 138

    Шыны керек, кейінгі кезде көп комедиялар көңілімнен шықпайды. Солардың бірі Ресейлік фильм "Самый лучший день" болды. Шыны керек, Тимур Бекмамбетов түсіргендіктен "Елки" сияқты жаңа жылдық көңіл-күйді беретін ерекше әсер күтіп ем, үмітім ақталмады. 

    Жұмысы, қалыңдығы бар гай қызметкері аяқ асты "жұлдыз" қызбен кездесіп қалады. Екеуінің кездесуі көңіл көтеруден басталып, үйленеміз деп барлық әлемге жар салумен аяқталады. Бірақ, жұлдыздың мақсаты 2 күндік көңіл көтеру екенін қарапайым ауылдық жігіт түсінбей бар бақытынан айырыла жаздайды...

    Ұнамағаны:

    1. Кейінгі кезде Ресейлік фильмдерден байқағаным ішімдікдерті көп насихаттайтын боп барады. Комедиялары тек ішімдіктің айналасында құрылады. Жалпы Ресейліктерді көп ішетінін білсем де, оны көрсету біртүрлі сияқты.

    2. Дмитрий Нагиев. Білем, ол керемет актер. Бірақ, оны барлық фильмнен көре беруден шаршадым. Болсын, болмасын барлық фильмдерде оны түсіре беру артық.

    3. Киноның атына қарағанда жақсы күн ішу, ойыңа келгенін істеу ма? Біртүрлі идеология. Онсыз да демалуды арақ ішіп, пиво ішіп жату деп ойлайтын адамдарға жақсы қолдау сияқты.

    4. Басты рольдегі қыздың өміріндегі жағдай менің басыма келсе, мен ондай адамды ешқашан кешірмес ем. "Мүмкін сол үшін де әлі жүрген шығармын" деген ойды түсіндіргені ұнамады)). 

    Ұнағаны:

    1. "Жылтыраған нәрсе үшін қолыңдағы бақырыңды тастама" дейді ғой қазақта сол нәрсені түсіндіруге тырысқандары ұнады.

    Берер бағам 2/10. Мүмкін басқаларға ұнар, маған ұнамады.

  • Galymzhan Orazymbet

    Барлық рецензиялар: 1

    «Құнанбай» Менің көргенім

    Сонымен, көптен күткен «Құнанбай» да шықты. Бардық. Көрдік. Бұрын-соңды фильмге пікір жазбаған, ең болмаса әуесқой кинотанушы болмаған соң талдап тастау қиын екен. Дегенмен, орта статистика өлімшісі ретінде өзім көрген, байқаған жайларымды айтып өтейін.

    Актерлар. Образдар.

    Құнанбай. Досхан Жолжақсынов Құнанбайды жақсы алып шыққан. Тіпті оның Досхан Жолжақсынов екенін бір сәтке ұмытасың. Өз кейіпкерін ойнамаған, сол болып өмір сүрген. Шеберлігінде мін жоқ. Ал Құнанбайдың өзі басқа қырынан танылды маған. Бұрын «Абай жолынан» қатыгез, бірбет, айттым бітті феодалды көрген соң, мына кейіпте көру жаңалық болды. Ойшыл, парасатты, өр мінез болғанымен бетпақ емес, озық ойлы, жауапкершілікті терең сезінетін, оратор тұлға. Қодарға өлім кескенде, Зеремен ақылдасқанда, марқұмды лайықты жерлеңдер дегенде бидің Құнанбайға айтқаны, т.б. оның осы қырларын жақсы аша білген.  Бірқатар көрермен «Абай жолындағы» Құнанбайды көре алмай, тым мейірімді, жұмсақ шығыпты деп те жатқан көрінеді. Құнанбайдың тап қандай болғанын дәл қазір ешкім де айта алмайды. Бұл ең алдымен драматург пен режисердің көзқарасы, бас кейіпкерді қалай танитыны екенін ескеру керек. Әрбір кейіпкер жайлы фильм түсірілгенде ең алдымен ескерілуі керек жайт бұл, меніңше.

    Зере. Ақылды, мінезді, қамқор, терең қазақ әжесін көрсете алған. Актриса Нұрсипат Салықова апамызға мың алғыс. Құнанбайды Құнанбай еткен адамды көруге болады. Зере ең алдымен ақылшы, сүйеніш. Содан соң ғана ана. Ботам-айлап ерітетін емес, қажет болса бір ауыз сөзбен ғана, немесе көзқарасымен ғана ширатып алатын қамқоршы. Ол Қодар мен Қамқа сотында және Құнанбайды Омбыға тергеуге әкетіп бара жатқандағы шығарып салған жерлерінен анық көрінеді. Бұл жерде де актриса рольді ойнамаған, сол рольмен өмір сүрген деп қысқа қайыра салайық. Толығын әркім өзі көре жатар.

    Барақ. Барақ ролін сомдаған Айдос Бектеміров ағамызға да алғыс. Өр мінез қазақ шонжарының бейнесін бере алған. Қанша жерден ру намысы, ел намысы десе де парасаттылықтан, әділдіктен аттап кете алмаған, жеме жемге келгенде «өкпеге қиса да, өлімге қимайтын» бауырмал, ірілік таныта алатын тұлға. Құнанбаймен арадағы қарым-қатынастарын тәптіштеп жазбай-ақ қояйын. Фильм жасаушылар бауырмалдықты, ірілікті жақсы насихаттай алыпты.

    Ұлжан мен Абайды фильмнен іздеудің керегі жоқ. Олар фильмде жоқ. Абай жас болды, пәлендей Құнанбайдың образын аша алатын бір жағы болмаған шығар. Бірақ Ұлжанды танытатын тұстар болса деген үміт болды. Бірақ ол үміт ақталмады.

    Өзім ерекше атап өте алатын образдарым мен актерлерім осылар. Басқа актерлер анық көрінбейді. Тіпті бірқатары көңілімнен шықпады да. Олардың ойынын қарап отырып спектакль көріп отырғандай әсерде болдым. Театр мен кино екі бөлек дүние ғой, актер деген аты бір болғанымен. Сондықтан таза кино актерлерін көбірек тартпай, театр актерлерімен сапалы фильм жасаймын деу орынсыз сияқты. Әрине, театрда да, кинода да ойнай алатын актерлер жоқ емес. Бірақ мына фильмде олар аз. Өте аз.

    Киімдер

    Сол заман киімдерінің маманы болмаған соң дұрыс бағасын беру қиын. Бірақ қазақ билерін, сұлтандарын көрсеткенде барлық сән-салтанатын паш ететін шығар, пафос болатын шығар деген ой болған. Ондайын байқамадым. Әркім өз статусына лайық, артықшылықсыз, әсіре салтанатсыз, жинақы киінген. Жалпы костюмдері ұнады. Әйелдер киімі де, ерлер де.

    Дыбысталуы көңілімнен шықпады. Сапасы жақсы деп айта алмаймын.

    Диалогтары сәтті шыққан. Көзбен емес, құлақпен «көретін» фильм жасай алған. Бос, артық сөз байқамадым. 

    Мазмұны.

    Фильм таза қазақ аудиториясына арналған. Неге Голливуд бағындырмайды? Тұрсыновтан қай жері кем? - деген сұрақтар артық. Негізі Тұрсынов фильмдерінің де сол жаққа өтетініне күмәнім бар. Дені дұрыс бір фильмін айта алмаймын. Мейлі, тақырыптан ауытқымайық. Жалпы фильм Құнанбай арқылы қазақияны ашу, дәріптеуді көздеді ме,  әлде қазақшылық, қазақы дүниетаным арқылы Құнанбайды танытуды мақсат тұтты ма, дөп басып айту қиын. Шет ел фильмдерінде басты назар кейіпкерге, тұлғаға бөлініп, ұлты, азаматтығы, басқасы соны ашуға қызмет етіп тұратын болса, бұл жерде екі жақ бір-бірін толықтыруға тырысатын сияқты. Тіпті кей жерінде Құнанбайдың өзі ұлт болмысын насихаттауға қызмет етіп кеткендей болды. Жалпы, Құнанбай да ашылған, фильмнің өзі де тұнып тұрған қазақия. Тіпті драматург пен режисердің миы фильмді қалай толтырамыз деп емес, осының бәрін қалай сыйдырамыз деп қатқанға ұқсайды. Әрбір көрінісінде әйтеуір қазақтың, салттың, дүниетанымның бір қырын көрсетіп қалуға тырысқандай. Сондықтан да көріп отырып сәл де болса босаңсу мүмкін емес. Келесі бір сәтте нені өткізіп аламын, назардан тыс қалдырамын деп мұқият қарап отырасың.  Драматург ең алдымен бұл дүниені өзінің деңгейіне жеткізуге қатты тырысқан ба дедім. Жеткізе алғанын-алмағанын драматург пен қазақияны тереңірек танитындар айта жатар. Мен үшін мазмұны мағынаға толы, шектен тыс мағыналы болып көрінді. Қорыту үшін де көп оқу керек, көп білу керек. Жеке сәттерге тоқталайын енді.

    Жартылай жалаңаш әйелдің арқанды тіспен шешіп, түйе алу көрінісі. Батыл қадам. Қазіргі діндары көп, ұраншыл ұлтшылы көп қазақ қоғамында қалай қабылданатынын, сыналатынын, теріске шығарылатынын авторлар білмеді дегенге сенбеймін. Н.Хлудовтың картинасы әлеуметтік желілерде қалай талқыланып, қалай сотталғаны есімізде. Соны көріп, біліп отырып олар қоғамға бейімделуді емес, негізгі мақсаты – сол қазақ дүниетанымын толық беруді алдыңғы орынға қойған сияқты. Оны сәтті жасай алды да. Қолдаймын.

    Қодар мен Қамқа соты. Әрине, бұл инцест. Сонау ескі заман түгілі қазіргі заманда да көпшілік айыптайтын, қылмыс санайтын қарым-қатынас түрі. Ал ол заманда екеуіне осындай үкім айтылғанын айыптау да қиын. Маған қызық болған тұсы басқа. Құнанбай үкімді өзі шығармады. Билер сотына салды. Фильмде екеуін өлімге қимайтыны, басқа жолдарын іздегені жақсы көрінеді. Тіпті алғаш естігенде сенгісі келмей, толық көз жеткізгісі келгені де содан болса керек. Екінші бір сәт – үкім шығаруда алдымен ата заңға, ескі салт-дәстүр заңына сүйенгені. Билерге тарихымызда осындай жағдай болып па еді, соны біліңдер. Болса, үкімі не екен деп өтініш айтады. Тек ондай жағдай табылмаған соң ғана шариғатқа жүгінеді. (Қазақта болмаған, немесе оған дейін білінбеген қылмыс болса, қайтсін енді).  Яғни, ата заңды шариғат заңынан жоғары қойып тұр. Қажы барып, ол жақта мешіт салдырған, аузынан Алласы түспеген тақуа Құнанбай бұл.

    Керей мен Қаракесек дауы. Бұл жерде адам өлімі бар. Қанға қан принципімен қарсы жақтан кісі өлімін талап етсе де болар ма еді. Бірақ сол жердегі сөзі тіпті керемет. Қанға қан деп өзеуреген билерге: сендерге рудың намысы деген сөз, абырой керек. Ал жесірдің жайын кім ойлайды?- деп, мәселені құнмен, ең бастысы ақылмен шешкен тұсында БРАВО! деп  дауыстап жібере жаздадым. Құнанбайдың тереңдігін осы жерімен-ақ көрсетіп бере алған.

    Жалпы Қодар соты мен рулар арасындағы сотта бір тұсы қызық көрінді. Алдыңғысында үкім – өлім жазасы болды. Кейінгісінде – малмен құн төлеу. Бірінші жағдайда үкім шариғатқа сүйеніп жасалды. Екіншісі – ата заңға, дәстүр заңына сүйенді.  Гуманизм тұрғысынан қарасақ, ата заңда ол басым, тіпті таза гуманистік сипат бар. Ал шариғат қатал. Зина – өлім. Саған қазіргі заманда отырып үкім айту оңай деушілер табылып жатар. Бірақ екі оқиға да сол кезде болып, екі үкім де сол заманда айтылғанын ескеру керек. Сонымен бірге Қодар мен Қамқа ісінде өлімнен басқа да үкім түрі болды – елден аластау. Бірақ шариғатқа салып жібергенде ол далада қалды. Ал шындап келгенде екінші жағдайда өлім жазасы болса да ешкім пәлен деп соттай қоймас па еді. Бірақ, бұл жерде мәселе үкімге негіз болған құралда болып тұр.

    Айтқандай, Құнанбай тергеліп жатқанда ана бір тілмашты жақтырмай отырғам. Атаңалет, құйыршық. Осыдан басқа нан табатын кәсіп қалмады ма дегендей. Эмоция ғой енді. Ал Құнанбайдың соңғы төгіп-төгіп тастаған соңғы сөзін аудара алмай, қандасын жамандыққа қимай қиналған кезінде: Әп, бәрекелді! Осылай болуы керек еді ғой,  - деп мәз болып қалдым. Арқаң шымырлап кетеді екен. Құнанбай мен Барақтың қимастығындай емес демесең, ол да мақтауға лайық әрекет. Мүмкін пара пар да шығар. Сол үшін де драматургке салауат. 

     

    Бұл фильм қазақ кинематографиясының алтын қорына кіре алады ма, оны нақты айта алмаймын. Кіреді деген сенімім басым. Қалай болғанда да көруге тұрарлық, әркім-ақ көруі керек дүние деген оймен шықтым. Ал фильмді көріп шыққаннан кейінгі алғашқы әсер осылай. Әлі толық қорытып бітпедім. Бір рет көріп, қорытып алатын фильмге ұқсамайды. Сол үшін әлі қайталап көрермін. Мүмкін кей байқамай қалған тұстарымды көріп, толықтырармын.  Бір жері туралы пікірім де өзгерер. Әзірге осы.

  • Ернар Бекенов

    Барлық рецензиялар: 119

    Төрт фильмге созылған антиутопия да өз ақырына жетті. Кітабы бестселлерлер қатарынан көрінсе де, экранизациясы кереметтей мақтау-мадақтауға бөлене алмады.

    Сонау бірінші сериясынан-ақ бір нәрсе жетіспегендей көрінген. Созылыңқы сюжеті мен бірсарынды өрбуі кері әсер еткен секілді. Бастапқыда тақырыпқа қанықпағандықтаннан ба, әйтеуір мынау неғылған ойын, неғылған персонаждар деп тыржия қалғандардың бірі едім. Бірақ "Тұтанған өрттің" финалында революцияның белгілері қылаң бергенде, қызықтың "көкесі" алда деуге үміт бар еді. Олай болмай шықты.

    Фильмді жасаушылар хронометраждың ұзақтығынан көп қателесті ме деймін. Негізгі атмосфераны кітаптағыдай әсерлі беру үшін детальдарға көңіл бөлгені түсінікті ғой. Бірақ динамиканың жетіспейтінін кәдімгідей байқалады.

    Барлық бөлімдерін көрген адам ретінде айтайын - бір сарында дамыған бүкіл бөлімдерінің фонында ақырғы сериясы бәрібір ерекше. Көпшілігі бұнымен келіспейді, оны түрлі жазбалардан оқып жүрмін. Бірақ осыған дейін баяу жылжып келген франшизадан "бомба" күту де қисынсыз. Сол себепті барлығының ішінде ақырғы бөлімнің айтары да бар, бір саты жоғары деп бағалауға да негіз бар.

    Филип Сеймур Хоффманның мезгілсіз қайтыс болуы екінші "Құйқылжық торғайдың" финалына бірқатар өзгертулер енгізуге себеп болды дейді. Осы бір үнемі күлімдеп тұратын, жүзі жылы актердің соңғы эпизодтарда жетіспей тұрғаны кәдімгідей сезіледі. Сюжет бойынша төңкерістің басты тұлғаларының бірі еді ғой.

    "Құйқылжық торғай - 2 бөлім" - бүкіл оқиғаның қорытындысы. Фильмдер сериясын басынан бастап көріп келе жатқандар лайықты нәтижеге куә болады деп ойлаймын. Соңғы кадрларына қарап әркім өзінше ой түйеді, тиісті бағасын береді.

  • Айкона

    Барлық рецензиялар: 138

    Диснейдің мультфильмдерін қарау балаға ғана емес үлкен кісілерге де әрқашан қызық. Мүмкін, диснейдің ең ұтымды тұсы осы шығар. 

    "Хороший динозавр" атты мультфильмнің көрсетіліміне жолым түсті. Екі інім менен бұрын қатты қуанды.  Себебі, олар мен ойлағаннан да динозаврлар жайлы көп біледі екен. 

    Мені қызықтырған мультфильмдегі бүлдіршін болды. Ол сондай ақылды және динозаврлар заманында өмір сүруге бейімделген. Ең қызығы, мультфильмде ол адамнан гөрі динозаврдың күшігіне қатты ұқсайды. Шыны керек, осы ойыма әбден күлдім :). Мүмкін, алғашқы адамдар сондай болған шығар (бұл інімнің маған айтқан ойы).

    Арло есімді кішкентай динозавр өмірге келеді, бірақ ол динозаврға сай емес өте қорқақ болады. Өмірдің өзі оны қорқынышынан айыру үшін өмірдің соқпағына салады. Мультфильм баланы бауырмалдыққа, өзіне сенуге, ата-ананы жақсы көріп қана қоймай оларды тыңдауды үйретеді. Достықтың не екенін көрсететін жақсы мысал.

    2-10 жас аралығындағы балаларға арналған тәрбиелік мәні бар жақсы мультфильм. Мультфильмде қуаныш, қайғы, сенім, мейірімділік бәрі бар. Балаңызбен, ініңізбен бірге мәз болып көретін ең жақсы туынды.