• Біздің парақшалар:
  • pецензиялар (барлығы: 416)

  • Private Rayan

    Барлық рецензиялар: 9

    Режиссурасы нашарлау, сюжеті шұбалаңдау болған жерлері баршылық, Қайта-қайта Томиристің аян түсін көрсеткені - өзіне өзі спойлер жасау. Графикасы жұтаңдау. Бірақ, құрығыр, ана жер, мына жерінде тебіреніп кете бердім.

    Актерлерден М.Бейсембин, Айжан Иргалиева (Сардана) ұнады. Әсіресе ат құлағында ойнағандары, соғыс алаңында жақсы қылыштасқандары ұнады, демек актерлер арнайы дайындалған. Дегенмен қанша жауынгер болса да, патшайымның ордасы сәл жабайы халықтардікіне ұқсап кеткен сияқты, аздап болса да, сән-салтанат берсе болар еді.

  • Private Rayan

    Барлық рецензиялар: 9

    Өте әдемі етіп түсірген. Мультфильм көрмейтін маған ұнады. Қазақша көргенім дұрыс болыпты, сәтті шыққан

  • Айкона

    Барлық рецензиялар: 138

    Жәй ғана кино көріп көңіл көтергіңіз келсе осы фильмге барыңыз. Мейіржан мен Мейірханның өздері айтпақшы, "ешқандай мағына, логика не мән іздеудің қажеті жоқ. Жәй ғана кино көріп, күліп қайтыңыз".

    "Регистратор" фильмін ұсынған Медет Аманбаев пен Мейіржан Төребаев, Мейірхан Шерниязов үшеуі біргіп тағы бір фильмді түсіруге шешім қабылдаған. Фильм Алтын емел саябағында 20 күннің ішінде түсірілген екен. Үшеуі бірігіп сценариін жазған. Фильмді түсіру идеясы осыдан 2 жыл бұрын келген.

    Фильм қазіргі біздегі бар комедиялардан жанры ерекше. Киімдері мен қимылдарына, түр әлпетіне қарап-ақ күліп отырасың. Фильм ерте заманғы болса да заманауи өмірдің сөздері мен кейбір фишкаларын қолданған.

    Ешқандай мағына іздемеңіздер дегенмен, фильмде қазақтардың еріншектігі мен ертеңгі күндерін ойламайтындығы мен билікке ұмтылғыш келетінін сынға алған.

    Шынымен, той тақырыбынан жалыққандарға бір ерекшелік бере алатын қызық комедия болған. Әр кейіпкер ойланылған және әр қайсысының сөздік қоры жақсы берлген.

    Көңіл көтеріп, күліп қайтуға арналған жақсы комедия шығара алған.

  • Айкона

    Барлық рецензиялар: 138

    Трейлерін көрген кезден бастап осы мультфильмді көргім келді. Бір жағы мультикке деген махаббатым болса, бір жағынан мультфильмнің сюжеті қызықтырды. Онда Қытайдый әдемі жерлеріне деген саяхат бар, мейірімділік бар және жануарларға деген сүйіспеншілік бар.

    Ойымнан қателеспеппін, себебі мультфильмді балалардың ғана емес үлкендердің де көңілінен шыққанын байқадым. Ол сондай тартымды, әдемі, оқиғасы қызық, мейірімділікке толы әрі табиғатта саяхаттауға шақырады. Әрі мультфильмде табиғат пен заманау қоғам астасып жатыр. Селфи жасау мен қатар табиғаттың толқыны адамға ерекше сезім сыйлайды. Бір уақыт өзің бір осынау әдемі ертегіде жүргендей күй кешесің.

    Мультиктердегі образдар жақсы таңдалған, әрі қытайларға деген көзқарасты өзгерутге тырысқан. Дегенмен, қытайлары бар Мулан, Город героев жобалары сияқты тартымды, әрі шығысқа тән философиялық айтар ойы бар ерекше туынды болған. Лу, Пин, Джин, Лудың апасы, жауыз Берныштың өз образдары мен мінез-құлықтары анық берілген. Тіпті ағылшынша атауындағыдай ұсқынсыз йетидің өзі мейірімді, балалығы әлі қайтпаған алаңғасарлығы әдемі жеткізілген.

    Мультфильм нені үйретеді?

    1. Мейірімділікке. Ол табиғатқа, жан-жануарларға, адамдардың бір-біріне деген мейірділігіне шақырады. Йетиді күнделікті көріп жүрмесе де балалар онымен достасып, оны үйіне апарып тастайды. Мультфильмде ата-ананың махаббаты, достық бәрі орын алған.

    2. Арманға ұмтылуға. Арманына жету үшін шаршамай жұмыс істеген қыздың арманына жеткенін, қиындық кезінде құлап қалмай қайта бар күшін салып қайта алға жылжуға болатынын үйретеді.

    3.Саяхат. Саяхаттау қазірге қоғамның ең үлкен жетістігі екенін көрсетеді. Жай бір қалаға емес Эверестке шығуға болатынына сендіреді.

    4. Өнер. Қандай өнер болсын қуану кере және оның шыңына шығатыныңа сену керектігін үйрете алады.

    Мультфильм сондай позитивті, мотиваторлық ойға толы, әрі сондай қызықты. Балаңызға мотивация сыйлағыңыз келсе, оның көңілін көтергіңіз келсе осы мультфильмге апарыңыз. Жақсы ой тек алға жетелейтінін осы мультфильм арқылы оңай түсіндіре аласыз.

  • Ернар Бекенов

    Барлық рецензиялар: 119

    Комикстен әлеуметтік драма жасауға бола ма? Болады екен.

    Джокер туралы, Бэтменнің әлемі туралы ұмытыңыз. Бұл жерде айтылатын әңгіме басқа - қоғамның проблемаларын көтеретін, сол проблемалардың салдарын адам кейпімен көрсететін драма. Сол себепті бұнда экшн да, комиксқа тән басқа да сипаттар жоқ деуге болады.

    Әдетте біз қылмыскерді көрсек - оған бар лағынетімізді төгеміз. Жасаған қылмыстары үшін жазғырамыз, кінәлаймыз. Бірақ оның сондай адам болып шыққанына біздің де үлесіміз бар екенін ескермейміз. Адам өздігінен жаман болмайды, оған қоғамдағы түрлі факторлар әсер етеді. Ал қоғам дегеніміз - сіз, ол, мен және барлығы. Демек зұлымдыққа біз де жан-жақтан үлес қосамыз. Фильмнің қысқаша моралі осы.

    Картинада компьютерлік графика мейілінше аз, көп кадрлар қала көшелерінде түсірілген. Бұл жағдай оқиғаны шынайы қабылдауға, барынша шын өмірге жақындата отырып қабылдауға ықпал етеді.

    Тодд Филлипс - "Бас жазу" деген комедия трилогияны түсірген режиссер. Жеңіл комедиядадан кейін оның осыншалықты салмақты жұмысын көру - кәдімгідей сюрприз болды. Ал Хоакин Феникстің шеберлігіне еш күмән болмаған, осы рөлінен кейін оған құрмет арта түседі деген сенімдемін.

    Фильмнің музыкалық безендірілуі тамаша. Әр ситуацияға сай ән таңдалып, ол тиісті әсердің берілуіне сеп болады. Ал фильмнің стилистикасы сюжеттегі 1980 жылдардың атмосферасын жақсы береді. Құдды Скорсезенің жұмысын көріп отырғандай күй кешесің.

    Скорсезе демекші, Роберт Де Нироның қатысуында бір сыр бар сияқты. Режиссер осы арқылы "Таксиге" құрмет көрсетті деп ойлаймын. Өйткені ондағы оқиға да жалғыз басты психопаттың бейнесін суреттеп еді ғой.

    Деталі көп әрі олар табиғи үйлесім тапқан, ерекше махаббатпен жасалған фильм.

  • Айкона

    Барлық рецензиялар: 138

    3 жылдан аса күткен үлкен жобалардың бірі болды. Томирис жайлы фильм түсіреді деген күннен бастап бала кезімізде тарихтан оқыған батыр қыздың образы, ол туралы фильм қандай болады деген ой ұзақ мазалады. «Еее, Ақан Сатаев түсіреді ғой» деп сенімсіз көңілім бір басу алған.

    Алайда, А.Сатаевтың басқа фильмдеріндей әсер ала алмадым. Тіпті, елдің бәрі мақтаған «Анаға апарар жол» сияқты қимастық бір сезімді де сыйлай алмады. Мүмкін, мемлекеттік тапсырыс болғасын режиссер өз ойындағысын іске асыра алмады ма, әлде, тарихи фильмге бұл кісінің күші жетпеді ме, фильм «оу, мен күткен керемет фильм болды» деп жұртты таңқалдыра алмады. Мүмкін, сонша мақтап, инстаграмнан тауып алған актрисалары өздері күткендей әсер бере алмады. Тым бір сұсты, тым бір мінезді қыздың образын Альмира Тұрсыннан көре алмадым, өмірі бір нәрсеге көңілі толмай қабағын түсіріп жүретін қатынды ғана байқағандай болдым, одан басқа эмоциялар қайда?… Оған қарағанда Айжан Лайджи сомдамаған сармат қызының образы «ух, мінезі қандайды» дегіздірді.

    Жалпы алғанда не ұнамады?

    Тіл. Өзіміздің тіліміз шатасып жүрген кезде мына үш тілді фильм мүлдем шатастырып жіберді. Фильм сақ тілінде болғанымен, орыс тіліндегі дубляжбен бірге келген жерлерде кейбір сөздерді түсінбей де, естімей де қаласың. Сасқаныңнан не айтты деп қазақ тіліндегі субтитрға көзің жүгіреді. (Жалпы осы субтитрлар адамға кез-келген фильмді дұрыстап көруге мүмкіндік бермейді).

    3D қолдану. Ана қанаты бар шоқ болып жанып тұрған жолбарыстың бейнесін көрген кезде, не ойларымды білмей қалдым. Тим Бертонның соңғы фильмдеріндегі образдары ана жолбарыспен жолықпайтыны қандай қуантты десеңізші.

    Табиғат. Қазақтың жері ылғи құмды шөл даладан тұрады ма деп қалдым. Неге, керемет жерлер жоқ, құм дала, шаң-топырақ. Жалпы, сақтардың орналасқан жері Алматы облысындағы Есік қаласының маңы, сонда ол жердегі таулар қайда кеткен? Тарихи фильм болғандықтан, аздап болсын тарихи факторларға қарау керек қой! Есік қаласының маңы бекер хан ордасы болып таңдалмаған. Себебі сіз Есік қаласынан шығып төмен түсіп келе жатқанда айналадағы жер алақандағыдай боп көрінеді. Ол жердегі қорымдарды кадрға енгізу керек пе еді?..

    Декорация. Неге сақтардың қорғаны жапа там? Сақтар соншалықты кедей болған ба? Алтын адамның қазіргі табылған мүрдесінде соншама алтыны болған халық сондайлық үйде тұрды дегенге сенгім келмеді. Сонан соң, түсінгенім бойынша Томиристың ұлы Сарғапты жерлеген кезде ол қазіргі Алтын адам болса, жерлеу рәсімі өте қарапайым болған. Сонан соң әкесі екеуін неге бірге жерледі? Фильм ТАРИХИ деген мәртебеге ие болғандықтан, мұндай қателікке бой алдырмау керек деп ойлаймын.

    Не ұнады?

    Кейіпкерлердің костюмдері. Киімдері мен гримдері, көздерінің жасылдығы бірден көзге түседі. Бірақ, сұр түс басым. Дегенмен, костюм бойынша барлық детальдар ойластырылған және әдемі берілген. Әсіресе ер адамдардың бас киімдері әдемі берілген. Томиристің киімдері де жақсы шыққан.

    Соғыс кадрлары. Жоғарыдан, жақыннан, соғысу тактикаларын жақсы түсірген. Томиристің әкесімен жаттығуы, ұлының әкесімен жаттығуы жақсы берілген.

    Актерлар құрамы. Көбі танымал актрерлар екенін білеміз ғой, дегенмен Аян Өтепберген, Азамат Сатыбалды, Айжан Лайджи, Томиристың кішкентай кезін сомдаған қызды өздеріне берілген міндетті жақсы алып шыққан.

    Жалпы алғанда, фильмның қатты әсерін сезе алмадым. Бір рет көруге ғана жарайды.

  • Айкона

    Барлық рецензиялар: 138

    Фильм  маған ұнады. Кино сізді біраз уақытқа түнгі клубтар әлеміне енгізіп жібереді, Джей Лоның әдемі биі мен фигурасының әдемілігне таң қалдырады. Фильм стриптиз билеушілері туралы болғанымен, фильмнің әйелдер туралы екенін олардың тағдырлары туралы екенін ұмытпау керек. Фильмде әйелдердің аналық мейірімі, достығы, мейірімі және ақша билеген қоғамда қалай да бірігіп ақша тауып өмір сүруге деген қажеттіліктерін көрсетеді. Олар алдау арқылы ақша тапса да, әйелдердің бір-біріне деген достығын, өздеріне деген сенімін көрсетеді.

    Берер бағам 8/10.

  • Ернар Бекенов

    Барлық рецензиялар: 119

    Бірінші бөлімде Әлдекімнің өз изюминкасы болды: Қолдап-қорғаштауды қажет ететін, онсыз да проблемалы лузер балаларды одан бетер үреймен қорлап, әбден ит сілікпесін шығарған-тын. Аяушылықты білмейтін осындай қасиетімен денеңді тітіркендіретін күшке ие еді. Есейген, тұлға болып қалыптасқан ересек азаматтар мен клоунның текетіресі онша тарта қоймады.

    Оның үстіне Пеннивайз да бұрынғыдай аса қорқынышты емес. Орасан күшке ие бұрынғы зұлым-құбыжықтан ештеңе қалмаған, назар жетіспеушіліктен комплекске ұрынған, аздап психикалық ауытқушылығы бар жасөспірімді еске түсірді. Ал бұндай адами міні бар құбыжық ендігәрі қорқынышты емес. Оның тылсымдығын, беймәлім кейпін сақтап қалу керек еді.

    3 сағатқа жуық созғылағаны нағыз мылжыңдық болды. Бө! деп аттракциондық қорқытулары болмаса, образбен, атмосферамен, тылсыммен шошыту әрекеттері іске аспады.

    Юморды көбейткендері де бір жағынан жақсы шығар, бірақ хоррорға тән атмосфераға енуге кішкене кедергі болғаны анық. Шығарма мен экранизацияның алшақтығы байқалады. Кино нұсқасы таза попкорндық болып кеткені қынжылтады.

  • Айкона

    Барлық рецензиялар: 138

    "Арыстан патша" көбіміздің балалығымызбен тығыз байланысты болғандықтан балалардан гөрі үлкендер көп күткен сияқты. Себебі, сүйікті мультфильміз енді қалай болады, сол эмоцияны сыйлай ала ма деген үміт көбірек болған сияқты.

    Disney түсіріп жүрген соңғы формат ұнайды, прям қасыңда жүргендей әсер береді. Мүмкін, мен IMAXпен қарағандықтан солай көріне ма, бірақ сондай әдемі. Бір уақыт осы әдеміліктің ішінде жүргендейсің.

    Сценарий өзімізге таныс болғандықтан қатты бір әсер күтпедім. Ескі нұсқасында жылаған адамдар сондай эмоция күткен сияқты, алай да олай болмады. Мен аздап сценарий өзгеретін шығар деп күткем, бірақ өзгермеген.

    Маған ұнамаған нәрсе музыка болды, мүмкін оригиналдағы әндерді қалдыру керек пе еді, бірақ Ресей әншілері орындаған әндер қатты әсер етпеді.

    Жалпы алғанда, фильм әдемі және сіздің балалағыңызды естелігін еске салады. Бұрынғы бөлімін қарамаған адамға фильм жақсы әсер етіп, балаларға ұнайтыны анық. Картинканың әдемілігі үшін қайта-қайта көрер ем.

     

  • Айкона

    Барлық рецензиялар: 138

    Трейлерін қараған кезде аздап сенімсіздік болған, бірақ фильм сондай көңілді шыққан. Питердің жасына сай жастықтың желі есіп тұр + жаз болғандықтан фильм көңілді әрі қызықты болды. Таңдалған музыкаларда позитивке толы.

    Иллюзия қатты ұнады, прям ерекше бере алған. Былай қарасаң фильмнің өзі біздің санамымызбен ойнау ғой, ал мында иллюзияның мүмкіндігінің қандай екенін ашып көрсете алды, сендіре алды.

    Жалпы алғанда Марвел өз мақсатына қол жеткізген, фильм қызықты әрі ерекше. Маған ұнады, әрі Питер Паркерден нағыз жастық шақтың энергиясы ұрып тұр.

  • Ернар Бекенов

    Барлық рецензиялар: 119

    "Өрмекші-адам: Үйден алыста" - сюжет тұрғысынан да, визуал эффектілер тұрғысынан да үлкен аттракцион. Бірінші бөлімде көрсетпеген небір трюктер мен эффектілерді көрсетті. Сюжеті фокус/сиқыр тақырыбына арналады, ол аздай фильмнің өзін үлкен фокус/сиқыр етіп ұсынған. Сондай бір каламбур ("Ералаштың" музыкасы: пю-пю-пю-пюююю). Осылайша көрермен санасымен ойнау.

    Десек те "Кек алушылардың" финалымен тікелей байланысты болуы, Марвел киноғаламына, әсіресе Темір адамға сілтемелер мен құрмет нышандары барлық кемшілігін жуып-шайып тұр.

    Мистерио образындағы Джейк Джилленхол тамаша. Тек кейіпкерінің образы сценаристер тарапынан аздап жете жасалмағандай әсер етті. Болашақта оралып жатса оған көбірек мүмкіндік ашыла жатар.

    Сюжет пен кейбір деталдарды түсіндіру тұрғысында ашылмай қалған бір-екі сұрақ бар. Дегенмен МКҒ фанаттарының көңілінен шығатыны анық. Әзіл, махаббат, Өрмекшінің мотивациясы мен ішкі күйзелісі, әрекеттеріне сендіруі - бәрі өз орнында.

  • Айкона

    Барлық рецензиялар: 138

    Фильм бұрынғы бөлімдері сияқты ерекше емес, ұзақ диалогтар көп. Ортасында жалығып кеттім. А так бір рет көруге ғана жарайды

  • Джек Шепард

    Барлық рецензиялар: 3

    2010 жылы шыққан, Крис Сандерс пен Дин ДеБлуаның "DreamWorks Animation" студиясы түсірген, толықметражды анимациялық фильмі. Басты рөлдерді дыбыстағандар: танымал "лузер" Джей Барушель мен иықтас "батыр" Джерард Батлер.

    Суреттемесі: Мультфильм, бір-бірінің ата жаулары, айдаһарлар мен викингтердің ортақ тіл табысып, достасуына жол ашқан Иккинг балақай туралы. Мультфильм өз тайпасының қатігез болса да, өмірге бейімделген дәстүрлерін қабылдай алмай, қан төгуге қаншалықты қарсы тұрғанына қарамастан, елден ерек болғандығы үшін өзін айыптаумен болатын нәзік эмоциялы оқиғаны арқау еткен.

    Иккингтің әлемі Кетік айдаһарды кездестіргенде астаң-кестеңі шығады. Осыған дейін айдаһарларды жауыз әрі қанішер деп келген Иккингтің қанаты сынған түнгі фурия, әлжуаз Кетікті көргенде, өзінің ерек тағдырын түсінеді. Тайпа көсемінің жолы еш болмайтын, сырықтай ұлы Иккингтің тағдыры Кетікпен және айдаһарлар әлемімен астасып кетеді.

    Көп жылдар бойы викингтер айдаһарларды өлтіріп, қырып, оларға тотальді аулау ұйымдастырып келген еді, сол сияқты көп жылдар бойы айдаһарлар викингтердің барлық азығын үздіксіз тонаумен болады. Бірақ, айдаһарлар өз қалауларынан тыс тонауға мүжбүр болғанына көзін жеткізген Иккинг жағдайды өзгерту керек екендігін ұғады. Бірақ, викингтер және олардың көсемі, Иккингтің әкесі өзінің ұлының сөзіне сенгісі келмейді.

    Түнгі фуря Кетіктің жол көрсетуімен айдаһарлар ұясына аттанған викингтердің әскері Иккингтің сөзінің растығына өз көздерін жеткізіп, айдаһарлармен иық тірестіріп, ортақ зұлымды жеңуге атсалысады. Әрине, соғыс құрбандықсыз болмайды, ал бұл жолы құрбандыққа Иккингтің сол аяғы шалынған екен. Сонымен, ағаш аяқ Иккинг пен түнгі фуря Кетік және викингтер мен айдаһарлар татуы жарасқан ортақ болашаққа жол тартады.

    Фильм балалармен қатар, ересектерге де ұнайды. Отбасылық сеанс ұйымдастыру үшін таптырмас картина деп бағалауға болады. Визуалды эффекттер мен анимацияның орындалу сапасы, сондай-ақ фильмнің сценарийлік кейбір жетістіктері жасына қарамай, барлық көрерменге қызық. Әрине, бұл - голливудтық клишелер мен сценарийлік ортақ оқиғалардың табы байқалғанымен, ерекше нәзіктікке құралған эмоционалды фильм.

    Қызықты деректер:

    - Фильм киноматографиялық өнер мен ғылым академиясының "Оскар" сыйлығына ұсынылған;

    - Фильм жарты жылдық айналымда жарты миллиардтық табыс тапқан;

    - Фильм британдық балалар жазушысы Крессида Коулдың кітаптар сериясы негізінде жасалған;

    - Фильмді барлық дерлік сыншылар визуалдық эффекттері мен персонаждардың арасындағы байланысы үшін тартымды деп бағалаған.