РЕЦЕНЗИЯЛАР (2)

• • Жандос Құсайын    ⚓
  • Тіке сілтеме
  • — 17 қаңтар 2014
  • Баға: 8/10

  Қоғам түрлі адамдардың омартасы. Қоғам бәрін жұтады. Қоғам бәрін шығарады. Жаман мен жақсының қатар қоныстануына кейде қоғамның өзі тәуелді. Себебі, жамансыз жақсының құны көк тиын. Жақсысыз қоғамның құны бес тиын.

  Prisoners.

  Айттым ғой, тағы да айта беремін. Голливуд екі тенденцияға ерік бергелі қашан. Бірі - «демократиялық құндылық». Екіншісі, әлбетте, Құдай тақырыбы. «Тұтқындар» фильмін кім көрді, сол ұғады. Мына төмендегі сұрақтың жауабын да сол біледі.

  «Ішіңізден шыққан баланы жоғалтып алудың қаншалықты қиын әрі ауыр екенін білесіз бе?»

  Сұрақтың жауабы оңай секілді. Ендеше, күн сайын қаншама бала жоғалуда? Сіз қанша құрдасты жоғалттыңыз? Құмар ойынға батып, құрдымға кеткендер ше? Ұрлық-қарлық? Секта?

  Фильмде Келлердің әйелі көз жасын көлдей қылып жатып, күйеуін кіналайтын жері бар: «сен біздің қорғанымыз едің ғой. Мен саған сендім ғой. Қызымыз неге жоғалды?»

  Енді осы сөздерден кейін, қызының іздеуіне өзінше кіріскен Келлердің өзі де шайтанға айналып кеткенін жақтау керек пе, жоқ па? Тұйық. Бумеранг. Немесе лабиринт.

  «Баланың жоғалуы бұл біздің Құдаймен арадағы өзара соғысымыз. Адамдар сенімін жоғалту үшін біз балаларды ұрлаймыз. Осылайша, сенімін жоғалтқан адамның шайтанға айналауы оңай.»

  «Тұтқындардың» философиясы осы. Қатал, әрі шын. Біздің қоғамда осындай адамдар бар. Сенімін жоғалтқан немесе сенімдерді жоққа шығарушы. Олар сіздің шайтанға айналуыңызды қалайды. Бостан-босқа сіздің артыңызға түсіп, сіздің сеніміңізді келемеждейді. Сіздің идеалдарыңызды қоғамдық талқыға салып, сіз ұнатқан қымбат дүниенің бағасын түсіруге барын салады. Олар сіздің жүйкеңізді жұқартуға арнайы тапсырма алған секілді. Бәлкім сол үшін жаралған да шығар ә? Аңдиды, өсектейді. Сосын, сосын... сізді жек көреді. Балаңызды ұрлайды, өзіңізді ұрлайды.

  «...Адамдар сенімін жоғалту үшін біз балаларды ұрлаймыз. Осылайша, сенімін жоғалтқан адамның шайтанға айналауы оңай.»

  Қоғамда жайлаған кіл жамандар мен кіл жақсылар. Қоғамда осылардан басқаларға орын жоқ. Бастысы, жақсылар түбі жеңіп шығады. Бастысы, бұл өмір әділдікке құрылған. Бастысы, осы. Осыған сенгім келеді.

  «Тұтқындар» - біздің тұтқын қоғам.

   

• • iDina_    ⚓
  • Тіке сілтеме
  • — 4 ақпан 2014
  • Баға: 7/10

  «Тұтқындар» - соңғы он жылдықтағы ең үздік психологиялық триллердің бірі. Күңгірт атмосферасымен, жаңбырлы ауа-райымен, өз рольдерін жақсы сомдаған актерларымен және үрей тудыратын саундтрегімен қамтылған кино. Фильм 2,5 сағаттық болса да, соңына дейін шиелініскен жағдайда отырасың. 

  Фильм, атынан-ақ белгілі, кішкентай екі қыздың із-түссіз жоғалып кетуі жайында. Дағдылы бір күнде, Массачусетс штатының кішігірім қалашығындағы екі отбасының бірінің үйінде қонақта отырған шағында болған келеңсіз жайт. Күдікті ретінде тәтесінің қарамағындағы психикалық ауруы бар жігіт ұсталады. Бірақ осы күнге дейін бір жұмысты сәтсіз орындамаған детектив ақыл-есі он жасар жігіттің мұндай қылмысқа баруына күмәнданып, түрмеден босатады. Себебі бұл маңда кезінде сексуалдық тұрғыда сотталған басқа да тоғыз қылмыскер бартын. Жалғыз күдіктінің босатылуына қарсы болған қыздың әкесі полицияға қарамай, уақыт өте қыздардың аман қалу мүмкіндігінің аздығын меңгеріп, «надейся на лучшее, готовься к худшему» деп өзінің тергеу жұмысын жүргізеді. 

  Мен үшін бұл фильм «қылмыскер кім», «қалай ұсталады» екен деген жай ғана тергеу ісі емес, нағыз драмалық шығарма, жан түршігерлік трагедияны көрсеткен сияқты. Басты рольде Анджелина Джоли ойнайтын «Подмена» секілді, бұл фильмде де уайымдап бітесің. Қайғылысы, бала ұрлап өлтіретін маньяктар жер бетінде баршылық. Сол себептен де болар, шын өмірге ұқсайтындықтан болар, біртүрлі қызымды есік алдына да жалғыз жібермеймін деген үрейлі әсерде қалдым. 

  Актерлік құрамға келетін болсақ, басты рольдерде Хью Джекман, Джейк Джилленхол ойнайды. Осы екі актердің арқасында сағатқа да қарамай, жүрегімді ұстап толқу үстінде отырдым. Көруге тұрарлық, әсіресе балалары бар отбасыларына көруге міндетті фильм деп ойлаймын.